Разилигин билдире

Н. ИЗАМУТДИНОВА

Муна артдагъы вакътилерде гьар  йыл дегенлей,  Рамазан айны ичинде бизин районну  рагьмулу ва чомарт къоллу дёргелили  уланы, ДР-ни  Халкъ Жыйыныны депутаты Магьамматов Магьамматсолтан Байболатович районну халкъына садагъалар уьлешип тура. Демек, Дёргели  юрт китапхананы ёлбашчысы Айшат Изиева М. Магьамматов  уьлешеген садагъалары гьакъда  айта туруп, артдагъы 20 йылны  ичинде гьар йыл Дёргелиде яшайгъан 2000-ден де къолай агьлюге ол  садагъа  уьлешегени, озокъда,  халкъын бек сююндюрегенин эсгерди. «Ол садагъасын  янгыз Дёргели юртгъа уьлешип   къоймай, Гьели, Паравул, Аданакъ,  Къакъамахи ва Къакъашура юртлагъа  да, демек, 6 юртгъа пайлай. 6 да  юртда яшайгъан бары да  агьлюлеге  ону гьар йыллыкъ садагъасы етише. Шо юртлулар ону агьлюсюндегилеге савлукъ, оьлгенлерине  Аллагьдан женнет тилей»,- деди.
Дёргели юртну  башчысы  Гьамзат Мурзаев шо садагъаланы бойнуна алып халкъгъа етишдиреген ёлдашлар булангъы оьзюню ёлугъувунда:  «Халкъын сююндюреген йимик, оьзю де сююнюп  къалсын, ожагъына Аллагь берекет  берсин. Гележек  ишлерин  Аллагь  къурашдырсын  деп, юртлулар  огъар алгъышлар эте. Сонг да, Магьамматсолтан  Магьамматов этген садагъаны тюзевлю халкъгъа   етишдирмек учун белсенген юрт¬лу  таза юрекли  уланлар: Ибрагьим Демиев,   Магьамматмухтар Темирболатов,  Къазимагьаммат Къадирагъаев, Насрулла Жамалутдинов  шо ишни  20 йылны узагъында  бек намуслу кюйде  кютелер. Юртлуланы къайсы  да олагъа  шо рагьмулу ишде даим кёмек этмеге гьазир.   Машин булан болсун яда къол кёмек болсун, юртлулар олагъа кёп сююп кёмеклеше. Бу йыл да  гьар ожакъгъа  1 къап ун, 1 къап шекер етишдирилди. Шо юртлулар учун нечакъы бола буса да, гёрмекли  кёмек болуп токътай.Сав юртну жамиятыны атындан  Магьамматсолтан Байболатовичге разилигибизни бирдагъы керен  билдиремен»,-деди Гь.Мурзаев.
Олай да,  М.Магьамматов  5-ер кило этип, эт  садагъалар да уьлешеген гезиклери  болагъаны гьакъда  да  ол эсгерди.
Дёргели юртлу къатынлар: Д.Шихсайитова С.Жа¬маева, З.Салигьова бары да  дёргелили къатынланы атындан Магьамматсолтан Магьамматовгъа  баракалла  билдире. «Этген садагъаларыгъызны Аллагь къабул этсин. Сиз адамлагъа  яхшылыкъ этмек учун яралгъансыз.Язны узагъында сиз берген шекерден нечакъы  компот,  мурапа этип болабыз.  Бизин къумукъ халкъны шулай гьайын этип болагъан уланы баргъа оьктем  болабыз. Сизге  Аллагь савлукъ, узакъ ¬оьмюр берсин. Этеген яхшы¬лыкъларыгъыз,   садагъаларыгъыз минг болуп сизге  къайтсын!»-дей олар.