Жагьиллер жамият ишлеге къуршала

Уллубийавул юртну жамияты бир-бири булан бек дослукъ аралыкълары, сыкълашыву, бирлиги булан бютюн дюньягъа белгили десек, башгъа къопдурув болмас. Айтагъаным, уллубийавуллулар бир-бирини яхшысына-яманына, къуванчына-къайгъысына табылагъан халкъ. Оьлген оьлюню гёмегенде ва хатабалагьдан от тюшгенде этеген кёмеклерин, къуллукъларын эсгерип къойсакъ да таман.

Олай да, Уллубийавулну жамияты юртну тазалыгъын, гёзеллигин болдурувда, субботниклер оьтгеривде, ёлланы ремонт ва онгарыв ишлерде оьзлерден болагъан кёмекни эте.

Масала, гетген йыл сув быргъыны ­янгыртыв ва ремонт ишлерде хас къурумлар булан бирче гёнгюллю кюйде кёмек этгенлер болду.
Муна, алдагъы гюнлерде федерал сылама ёлдан Уллубийавулгъа гелеген ёлну ремонт ишлери юрюлдю, бир-бир ерлерине асфальт салынды. Шо ишде «Карабудахкентское ДЭП № 17» ОАО-ну ишчилери булан янаша уллубий­авуллу жагьиллер де оьзлени кёмегин болдурдулар.
Демек, жагьиллер, инг башлап, асфальтны бузукъ ерлерин гесип тайдырып онгаргъан эди. Сонг буса ерге чайыр сюртюп, уьстюне асфальт салдылар. Ёлну асфальт этив ишлер 2 гюнню  узагъында юрюлдю. Шо 2 де гюнню  ичинде 15-20 уллубийавуллу  жагьил яш ёлну ремонт ва асфальт этив  ишлерине гёнгюллю ва къурумлу  кюйде къуршалдылар.

Олай да, 15-нчи апрелде федерал сылама ёлну боюнда тазалыкъ болдурулду. Шо субботникге де юрт администрацияны, яшлар бавуну къуллукъчулары булан бирче яшёрюмлер ва жагьиллер къуршалды. Олар ёл бойну тазалыгъын болдурду.
Гертилей де, оьсюп гелеген наслубуз жамият ишлеге оьзбашына ва гёнгюллю кюйде къуршалагъаны жамиятны бирлиги, дослугъу ва гележеги барлыгъын исбатлай.

Районная газета «Будни района»